ໂຄງການລິເລີ່ມໜຶ່ງແລວທາງໜຶ່ງເສັ້ນທາງ (BRI) ຂອງຈີນ ລວມມີບັນດາ ໂຄງການ ພື້ນຖານໂຄງລ່າງທົ່ວໂລກ ເຊິ່ງໂຄງການຂະໜາດໃຫຍ່ນີ້ສາມາດສ້າງຜົນປະໂຫຍດອັນໃຫຍ່ຫຼວງ ຫຼື ຜົນເສຍຫາຍຕໍ່ປະຊາຊົນຫຼາຍສິບລ້ານຄົນ, ຂຶ້ນກັບວ່າໂຄງການເຫຼົ່ານີ້ຖືກອອກແບບ, ສະໜອງທຶນ, ປະຕິບັດ ແລະ ດຳເນີນງານໄດ້ດີປານໃດ. ຫຼາຍໂຄງການທີ່ປະເທດເຈົ້າພາບ ມີກຸ່ມປະຊາກອນທີ່ມີ ຄວາມບອບບາງ ທີ່ການອອກສິດອອກສຽງ ແລະ ຄວາມກັງວົນຂອງຕົນອາດຈະຖືກມອງຂ້າມ ແລະ ຜູ້ທີ່ອາດຈະປະສົບກັບບັນຫາທີ່ບໍ່ສົມສ່ວນກັບໜຶ່ງ ຫຼື ຫຼາຍໂຄງການ BRI. ນອກຈາກນັ້ນ, ຜູ້ສະໜອງທຶນຂອງຈີນ, ຜູ້ພັດທະນາ ແລະ ຜູ້ຮັບເໝົາ ກໍອາດຈະຍັງບໍ່ຄຸ້ນເຄີຍກັບສິ່ງແວດລ້ອມ, ພາສາ ຫຼື ວັທະນະທຳຂອງທ້ອງຖິ່ນອີກດ້ວຍ.
ໃນປີ 2019, ສະຖາບັນນະໂຍບາຍປະຊາຄົມອາຊີ (ASPI) ໄດ້ຈັດພິມບົດລາຍງານ, ມຸ່ງໄປເຖິງໂຄງການລິເລີ່ມໜຶ່ງແລວທາງໜຶ່ງເສັ້ນທາງ, ເຊິ່ງໄດ້ກຳນົດບັນຫາ ແລະ ຂໍ້ສະເໜີແນະຂັ້ນສູງ ເພື່ອແນໃສ່ຊ່ວຍໃຫ້ບັນດາໂຄງການ BRI ບັນລຸຜົນປະໂຫຍດ ແລະ ຍືນຍົງ. ASPI ເຫັນວ່າມີຫຼາຍໂຄງການ BRI ຍັງບໍ່ໄດ້ມີການແກ້ໄຂສິດການນຳໃຊ້ທີ່ດິນ, ສຸຂະພາບ ແລະ ຄວາມປອດໄພຂອງຊຸມຊົນ (H&S), ບົດບາດຍິງຊາຍ, ມາດຕະຖານແຮງງານ ແລະບັນຫາສຳຄັນອື່ນໆ ຢ່າງພຽງພໍ. ການຄົ້ນຄວ້າວິໄຈ ກໍຍັງໄດ້ສະແດງໃຫ້ເຫັນວ່າ ຂໍ້ມູນທີ່ຊັດເຈນ ແລະ ສາມາດເຂົ້າເຖິງໄດ້ກ່ຽວກັບບັນດາໂຄງການ BRI ແລະ ຜົນກະທົບຂອງມັນ ຍັງບໍ່ໄດ້ມີການສະໜອງໃຫ້ຊຸມຊົນທີ່ໄດ້ຮັບຜົນກະທົບ ແລະ ຍັງບໍ່ໄດ້ສ້າງກົນໄກຢ່າງເປັນທາງການຂຶ້ນມາ ເພື່ອໃຫ້ປະຊາຊົນໃນທ້ອງຖິ່ນສາມາດຊອກຫາທາງແກ້ໄຂບັນຫາທີ່ເປັນຜົນມາຈາກໂຄງການເຫຼົ່ານີ້. ບົດລາຍງານຂອງ ASPI ໄດ້ໃຫ້ຄໍາແນະນໍາທີ່ສໍາຄັນສອງປະການ ຄື: ປະການທີໜຶ່ງ, ຜູ້ວາງແຜນໂຄງການ BRI ຄວນດໍາເນີນ ການປະເມີນຜົນກະທົບຕໍ່ສັງຄົມ (SIA), ຢ່າງລະອຽດ ແລະ ປະການທີສອງ, ສະມາຊິກຊຸມຊົນ ແລະ ຜູ້ມີສ່ວນກ່ຽວຂ້ອງຂອງປະເທດເຈົ້າພາບຄວນໄດ້ຮັບການແຈ້ງໃຫ້ຊາບ, ປຶກສາຫາລື ແລະ ມີສ່ວນຮ່ວມຕະຫຼອດໄລຍະຂອງແຕ່ລະໂຄງການພື້ນຖານໂຄງລ່າງ. ຊຸດເຄື່ອງມືນີ້ ຖືກອອກແບບມາເພື່ອຊ່ວຍໃຫ້ປະຊາກອນໃນທ້ອງຖິ່ນທັງ ໃນ ແລະ ອ້ອມແອ້ມໂຄງການ BRI ແລະ ຜູ້ຮັບເໝົາ, ຜູ້ພັດທະນາ ແລະ ຜູ້ສະໜອງທຶນຂອງຈີນ ສາມາດຮັບມືກັບສິ່ງທ້າທາຍເຫຼົ່ານີ້ໄດ້ດີຂຶ້ນ ແລະ ຈັດຕັ້ງປະຕິບັດບັນດາຄຳແນະນຳດັ່ງກ່າວ.
ASPI ໄດ້ດໍາເນີນການຄົ້ນຄ້ວາວິໄຈໃນທົ່ວອາຊີຕາເວັນອອກສຽງໃຕ້ ແລະ ອາຊີໃຕ້, ໂດຍສຸມໃສ່ໂດຍສະເພາະໃນກໍາປູເຈຍ, ລາວ ແລະ ອິນໂດເນເຊຍ. ສາມປະເທດນີ້ເປັນເຈົ້າພາບຈັດຕັ້ງບັນດາໂຄງການ BRI ຂະໜາດໃຫຍ່; ພວກເຂົາເຈົ້າແມ່ນຢູ່ໃນບັນດາປະເທດທໍາອິດທີ່ເຂົ້າຮ່ວມຂໍ້ລິເລີ່ມໃນປີ 2013 ແລະ ເຂົາເຈົ້າຢູ່ໃນໄລຍະທີ່ແຕກຕ່າງກັນຂອງການພັດທະນາເສດຖະກິດ. ເຖິງວ່າຊຸດເຄື່ອງມືດັ່ງກ່າວ ຈະມີຂໍ້ມູນສະເພາະບາງປະເທດ ແລະ ຈະມີເປັນພາສາແຫ່ງຊາດຂອງສາມປະເທດເຫຼົ່ານີ້ເທົ່ານັ້ນກໍຕາມ, ແຕ່ ກໍມີປະໂຫຍດຕໍ່ບັນດາຊຸມຊົນທີ່ໄດ້ຮັບຜົນກະທົບຈາກໂຄງການ BRI ຢູ່ບ່ອນອື່ນໃນອາຊີ ແລະ ທົ່ວໂລກ. ສະບັບພາສາຈີນ (ແບບງ່າຍ) ແມ່ນເປັນປະໂຫຍດໃນການຊ່ວຍເຫຼືອເຈົ້າໜ້າທີ່ຈີນ, ຜູ້ສະໜອງທຶນ, ຜູ້ພັດທະນາ ແລະ ຜູ້ຮັບເໝົາທີ່ກ່ຽວຂ້ອງກັບໂຄງການ BRI, ໂດຍສະເພາະໃນອາຊີຕາເວັນອອກສຽງໃຕ້.
ໃນການດຳເນີນການຄົ້ນຄ້ວານີ້, ASPI ໄດ້ສ້າງຕັ້ງກຸ່ມທີ່ປຶກສາຜູ້ຊ່ຽວຊານຈີນ ແລະ ສາກົນອື່ນໆ ທີ່ມີປະສົບການໃນການຕິດຕາມການລົງທຶນຢູ່ຕ່າງປະເທດ, ພັດທະນານະໂຍບາຍສິ່ງແວດລ້ອມ ແລະ ສັງຄົມ, ສ້າງຍຸດທະສາດເພື່ອອຳນວຍຄວາມສະດວກໃຫ້ແກ່ການມີສ່ວນຮ່ວມຂອງພາກສ່ວນກ່ຽວຂ້ອງ ແລະ ຊຸກຍູ້ການພັດທະນາແບບລວມສູນ ແລະ ຍືນຍົງ ລວມທັງສິດ ແລະ ຄວາມຈຳເປັນຂອງບັນດາຊຸມຊົນໃນທ້ອງຖິ່ນ. ນອກຈາກນັ້ນ ASPI ຍັງໄດ້ຮ່ວມມືກັບຄູ່ຮ່ວມພັດທະນາຂອງອົງການທີ່ບໍ່ຂຶ້ນກັບລັດຖະບານ (NGO) ໃນຫຼາຍປະເທດໃນພາກພື້ນອາຊີຕາເວັນອອກສຽງໃຕ້ ແລະ ອາຊີໃຕ້ ທີ່ຊ່ວຍດໍາເນີນການພາກສະໜາມ ແລະ ຈັດຕັ້ງການສໍາພາດຜູ້ມີສ່ວນກ່ຽວຂ້ອງ ແລະ ກອງປະຊຸມໂຕະມົນ.
ເປົ້າໝາຍຂອງ ASPI ແມ່ນເພື່ອຢາກໃຫ້ຊຸດເຄື່ອງມືນີ້ຖືກນຳໃຊ້ໂດຍຜູ້ມີສ່ວນກ່ຽວຂ້ອງໃນທ້ອງຖິ່ນທີ່ມີໂຄງການ BRI ທີ່ກຳລັງວາງແຜນ, ກຳລັງດຳເນີນການ ຫຼື ຫາກໍ່ສ້າງສຳເລັດໃໝ່ ເພື່ອໃຫ້ເຂົ້າໃຈເຖິງຂະບວນການ, ຂັ້ນຕອນ ແລະ ຜູ້ມີສ່ວນຮ່ວມໄດ້ດີຂຶ້ນ. ເຂົ້າໃຈດີຂຶ້ນໂດຍບັນດາພາກສ່ວນກ່ຽວຂ້ອງທັງໝົດສາມາດປ້ອງກັນບັນຫາ ແລະ ຫຼຸດຜ່ອນຄວາມຂັດແຍ້ງ. ນອກຈາກນັ້ນ, ເຄື່ອງມືອາດຈະຖືກນໍາໃຊ້ເພື່ອຮຽນຮູ້ກ່ຽວກັບການປະຕິບັດແລະ ມາດຕະຖານທີ່ດີທີ່ສຸດຂອງຈີນ ແລະ ສາກົນ, ເຊັ່ນດຽວກັນກັບການກໍານົດພາລະບົດບາດ ແລະ ຄວາມຮັບຜິດຊອບຂອງອົງການຕ່າງໆທີ່ກ່ຽວຂ້ອງກັບໂຄງການ BRI. ຊຸດເຄື່ອງມືໄດ້ອະທິບາຍເຖິງຂັ້ນຕອນທີ່ຜູ້ມີສ່ວນກ່ຽວຂ້ອງໃນທ້ອງຖິ່ນ ແລະ ບັນດາກຸ່ມສາມາດດຳເນີນການຖາມຄຳຖາມ, ແບ່ງປັນຄວາມຄິດ, ເຂົ້າຮ່ວມການໂຄສະນາຫາສຽງສາທາລະນະ, ດຳເນີນການແກ້ໄຂຂໍ້ຂັດແຍ່ງ ແລະ ປົກປ້ອງຜົນປະໂຫຍດຂອງຊຸມຊົນ.
ສໍາລັບຜູ້ໃຊ້ຊຸດເຄື່ອງມືທີ່ເປັນຄົນຈີນ, ພວກເຮົາອະທິບາຍອົງປະກອບຂອງການປະເມີນຜົນກະທົບຕໍ່ສິ່ງແວດລ້ອມ ແລະ ສັງຄົມ (ESIA) ແລະ ການມີສ່ວນຮ່ວມຂອງພາກສ່ວນກ່ຽວຂ້ອງ; ວາງມາດຕະຖານ ແລະ ແນວທາງປະຕິບັດລະດັບສາກົນ ແລະ ຈີນທີ່ກ່ຽວຂ້ອງ; ສະເໜີຂັ້ນຕອນການເຄື່ອນໄຫວສະເພາະທີ່ບັນດາບໍລິສັດຈີນ, ຜູ້ສະໜອງທຶນ ແລະ ຜູ້ກ່ຽວຂ້ອງອື່ນໆ ສາມາດປະຕິບັດໄດ້; ແລະ ອະທິບາຍວ່າ ມາດຕະການເຫຼົ່ານີ້ຈະຊ່ວຍບັນດາໂຄງການພື້ນຖານໂຄງລ່າງທີ່ມີຄວາມສ່ຽງ, ຫຼີກເວັ້ນບັນຫາ ແລະ ນໍາໄປສູ່ຜົນໄດ້ຮັບທີ່ດີກວ່າຄືແນວໃດ.
ສໍາລັບຂໍ້ມູນເພີ່ມຕື່ມ ຫຼື ຄໍາຖາມສະເພາະກ່ຽວກັບຊຸດເຄື່ອງມື, ກະລຸນາຕິດຕໍ່ພວກເຮົາໄດ້ທີ່ [email protected].
ທ່ານ Daniel R. Russel ເປັນຮອງປະທານຝ່າຍຄວາມໝັ້ນຄົງສາກົນ ແລະ ການທູດປະຈຳ ASPI. ກ່ອນໜ້ານີ້, ທ່ານໄດ້ຮັບໜ້າທີ່ເປັນນັກການທູດຢູ່ໃນສະຖານທູດ ແລະ ເປັນທູດອາວຸໂສທີ່ ASPI ເປັນໄລຍະໜຶ່ງປີ. ທ່ານເປັນສະມາຊິກດ້ານອາຊີບການງານຂອງ ອົງການບໍລິການຕ່າງປະເທດອາວຸໂສ ຢູ່ ກະຊວງການຕ່າງປະເທດແຫ່ງສະຫະລັດ, ຫວ່າງມໍ່ໆມານີ້, ທ່ານໄດ້ດຳລົງຕຳແໜ່ງເປັນຮອງລັດຖະມົນຕີການຕ່າງປະເທດອາຊີຕາເວັນອອກ ແລະ ປາຊີຟິກ. ທ່ານໄດ້ດຳລົງຕຳແໜ່ງຢູ່ທຳນຽບຂາວໃນຖານະເປັນຜູ້ຊ່ວຍພິເສດຂອງປະທານາທິບໍດີ ແລະ ຜູ້ອຳນວຍການອາວຸໂສສະພາຄວາມໝັ້ນຄົງແຫ່ງຊາດຝ່າຍອາຊີ, ເຊິ່ງເປັນບ່ອນທີ່ທ່ານໄດ້ຊ່ວຍສ້າງຄວາມດຸ່ນດ່ຽງດ້ານຍຸດທະສາດຂອງປະທານາທິບໍດີ ໂອບາມາ ກັບພາກພື້ນອາຊີ - ປາຊີຟິກ, ລວມທັງຄວາມພະຍາຍາມເພື່ອເພີ່ມທະວີການພົວພັນຮ່ວມມືຂອງອາເມລິກາກັບບັນດາອົງການຫຼາຍຝ່າຍ ແລະ ເປີດກວ້າງການຮ່ວມມືກັບບັນດາປະເທດທີ່ພົ້ນເດັ່ນໃນພາກພື້ນ. ໃນການດຳລົງຫຼາຍຕຳແໜ່ງຂອງທ່ານຢູ່ກະຊວງການຕ່າງປະເທດ, ທ່ານໄດ້ຮັບຕຳແໜ່ງເປັນຫົວໜ້າຫ້ອງການກະຊວງການຕ່າງປະເທດຍີ່ປຸ່ນ ແລະ ຫົວໜ້າ ສະຖານກົງສຸນໃຫຍ່ສະຫະລັດຢູ່ເມືອງ ໂອຊາກາ-ໂກເບ.
ທ່ານ Blake H. Berger ເປັນຮອງຜູ້ອໍານວຍການປະຈຳ ASPI. ກ່ອນທີ່ຈະເຂົ້າເຮັດວຽກນຳ ASPI, ທ່ານເປັນຜູ້ຮ່ວມການຄົ້ນຄວ້າຢູ່ສູນອາຊີ ແລະ ໂລກກາພິວັດ ຢູ່ໂຮງຮຽນນະໂຍບາຍສາທາລະນະ Lee Kuan Yew, ມະຫາວິທະຍາໄລແຫ່ງຊາດສິງກະໂປ. ຄວາມສົນໃຈໃນການຄົ້ນຄ້ວາຂອງທ່ານ Blake ໄດ້ແກ່ ສະມາຄົມບັນດາປະເທດອາຊີຕາເວັນອອກສຽງໃຕ້ (ອາຊຽນ), ໂຄງການຂໍ້ລິເລີ່ມໜຶ່ງແລວທາງໜຶ່ງເສັ້ນທາງ, ການເຊື່ອມໂຍງພາກພື້ນ, ການພົວພັນສາກົນ, ເສດຖະກິດການເມືອງ, ນະໂຍບາຍການຕ່າງປະເທດຂອງສະຫະລັດຕໍ່ອາຊີຕາເວັນອອກສ່ຽງໃຕ້ ແລະ ນະໂຍບາຍການຄ້າສາກົນ. ທ່ານ Blake ຈົບລະດັບປະລິນຍາໂທດ້ານການເມືອງປຽບທຽບ ໂດຍສຸມໃສ່ອາຊີຕາເວັນອອກສຽງໃຕ້ຈາກໂຮງຮຽນການບໍລິການສາກົນຂອງມະຫາວິທະຍາໄລອາເມລິກາ ແລະ ປະລິນຍາຕີດ້ານສັງຄົມວິທະຍາຈາກມະຫາວິທະຍາໄລ Massachusetts Boston.
ທ່ານ ນາງ Jacinta Y. Chen ເປັນຜູ້ຊ່ວຍໂຄງການປະຈຳ ASPI. ໃນຄວາມສາມາດນີ້, ທ່ານເຮັດວຽກຮ່ວມກັບຮອງປະທານ ASPI ທ່ານ Daniel Russel ແລະ ຮອງຜູ້ອໍານວຍການ ທ່ານ Blake Berger ກ່ຽວກັບບັນດາໂຄງການທີ່ກ່ຽວຂ້ອງກັບ BRI. ເມື່ອບໍ່ດົນມານີ້, ທ່ານໄດ້ຄົ້ນຄວ້າເຖິງແນວທາງປະຕິບັດທີ່ດີທີ່ສຸດ ສໍາລັບພື້ນຖານໂຄງລ່າງແບບຍືນຍົງ ແລະ ໄດ້ເປັນການປະກອບສ່ວນທີ່ສໍາຄັນໃນການພັດທະນາຊຸດເຄື່ອງມືດິຈິຕອນທໍາອິດຂອງ ASPI. ກ່ອນທີ່ຈະດຳລົງຕຳແໜ່ງນີ້, ທ່ານໄດ້ເຮັດວຽກເປັນນັກຮຽນຝຶກງານຄົ້ນຄ້ວາວິໄຈຢູ່ ASPI ແລະ ເປັນນັກວິໄຈນັກສຶກ ສາສໍາລັບສຳນັກງານທ່ານເຈົ້າຄອງນະຄອນ Los Angeles. ທ່ານ ນາງ Jacinta ຈົບປະລິນຍາຕີດ້ານປະຫວັດສາດ ແລະ ການເມືອງ ຈາກວິທະຍາໄລ Pomona ແລະ ຈະເຂົ້າຮຽນຕໍ່ທີ່ມະຫາວິທະຍາໄລ Cambridge ໃນຖານະນັກວິຊາການ Downing-Pomona ໃນລະດູໃບໄມ້ປົ່ງ ປີ 2022.
ໂຄງການນີ້ເກີດຂຶ້ນໄດ້ ໂດຍການສະໜັບສະໜູນຈາກມູນນິທິ Ford.